by Iqbal Azeem

mujhe apne zabt pe naaz thaa, sar-e-bazm raat ye kya hoa
meri aaNkh kaise chalak gai, mujhe ranj hai ye bura hoa

meri zindagi ke chiragh ka, ye mizaj koi niya nahi
abhi rooshni, abhi teergi, na jala hoa na bujha hoa

mujhe jo bhe dushman-e-jaaN mila, wohi pukhta kaar-e-jafa mila
na kisi ke zarb ghalat pari, na kisi ka teer khata hoa

mujhe aap quN na samhaj sake ye khud apne dil se he pouchiye
meri daastan-e-hayat ka to warq warq hai khula hoa

jo nazar bacha ke guzer gai mere samne se abhi abhi
ye mere shehar ke loug thaay, mere ghar se ghar hai mila hoa

humaiN is ka koi bhe haq nahi ke shareek-e-bazm-e-khuloos hooN
na humare paas naqab hai, na kuch aasteeN mai chupa hoa

mere aik ghosha-e-fikr maiN, meri zindagi se azeez ter
mera aik aisa bhe dost hai, jo kabhi mila na juda hoa

mujhe aik gali maiN para hoa, kisi bad'naseeb ka khat mila
kaNhi khoon-e-dil se likha hoa, kaNhi aaNsooN se mita hoa

mujhe hum safar bhe mila koi to shikasta haal meri tarah
kai manziloN ka thaka hoa, kaNhi raaste maiN luta hoa

humaiN apne ghar se chalay hoye, sar-e-raah umer guzer gai
koi justuju ka sila mila, na safar ka haq he adaa hoa